Жамбыл жыры – халық үні: Алматыда мәдени кеш өтті

Жамбыл жыры – халық үні: Алматыда мәдени кеш өтті
Алматы қаласында ұлы жырау Жамбыл Жабаевтың 180 жылдық мерейтойына орай «Жамбыл жыры – халық үні» атты салтанатты мәдени кеш ұйымдастырылды.

Іс-шараның барысы
Мерекелік басқосуға белгілі жазушылар, әдебиеттанушы ғалымдар, ақынның ұрпақтары мен жас оқырмандар қатысты. Кеш барысында қазақ халық поэзиясының алыбы Жамбыл Жабаевтың өмірі мен шығармашылығы кеңінен насихатталып, оның айтыс өнері мен жыр дәстүрін дамытудағы тарихи рөлі туралы баяндамалар жасалды. Сондай-ақ, ақынның отты жырлары оқылып, әуезді әндері шырқалды.

Мамандар пікірі
Кештің маңызы туралы қатысушылар өз ойларымен бөлісті:

Гүлсім Сапақова (Ішкі саясат басқармасы қоғамдық даму орталығының сарапшысы):

«Жамбыл бірнеше тарихи кезеңнің куәгері, суырып салма өнердің дүлдүлі. Біздің басты мақсатымыз – оның шығармашылығын жас ұрпаққа жеткізу және қазақ сөз өнерінің құдіретін түсіндіру».

Салтанат Жамбылова (Жамбыл Жабаев атындағы әдеби-мемориалдық музейінің директоры):

«Мерейтой аясында музейден ақынның киген шапанын, ордендері мен киелі домбырасын арнайы әкеліп, көрмеге қойдық. Сәкен Сейфуллин айтқандай, Жамбылдың жырлары – теңіз түбіндегі маржан. Сол асыл мұраны халқына паш ету – біздің азаматтық парызымыз».